Ministri i Jashtëm rus, Sergei Lavrov, ka konfirmuar se diplomatët amerikanë dhe rusë do të kenë bisedime të nivelit të lartë në Stamboll të enjten.

Bisedimet zhvillohen me qëllim të përmirësimit të marrëdhënieve diplomatike midis dy kombeve, veçanërisht në lidhje me mënyrën se si funksionojnë ambasadat e tyre.

Gjatë një konference për shtyp në Katar, Lavrov shtoi se fokusi do të jetë në krijimin e kushteve më të mira për diplomatët rusë në SHBA dhe homologët e tyre në Rusi, pas një sërë mosmarrëveshjesh mbi nivelet e personelit dhe pronat e ambasadave, për të cilat ai fajësoi administratën e Joe Bidenit, raporton Reuters.

“Diplomatët tanë të nivelit të lartë, ekspertët, do të takohen dhe do të shqyrtojnë problemet sistematike që janë akumuluar si rezultat i aktiviteteve të paligjshme të administratës së mëparshme për të krijuar pengesa artificiale për aktivitetet e ambasadës ruse, të cilës ne, natyrisht, i reaguam dhe krijuam gjithashtu kushte të pakëndshme për punën e ambasadës amerikane në Moskë”, ka thënë Lavrov./abcnews.al